O barco Awadi xa abandonou as augas de Ribeira, tras dez meses atracado no peirao local a consecuencia do incendio sufrido o pasado mes de setembro, a embarcación foi remolcada con éxito durante a mañá deste mércores 22 cara á ría de Vigo, concretamente rumbo á zona de Moaña.
A alcaldesa de Ribeira, María Sampedro, amosou a súa satisfacción pola resolución desta situación e quixo saír ao paso das críticas da oposición, rexeitando que houbese pasividade por parte das administracións. A rexedora subliñou que “aínda que o Concello non ten competencias directas en materia portuaria, a Administración local involucrouse desde o primeiro momento para buscar unha solución”.
“Alegrámonos de que por fin o Awadi fose remolcado. Creo que é inxusto dicir que isto ten que ver coa pasividade de Portos de Galicia ou do Concello, cando aquí se estivo facendo un traballo de xestión directo a pesar de non ter competencias nesta materia”, declarou a alcaldesa.
Explicou que a retirada do barco era unha responsabilidade da propia empresa armadora, a cal tiña que tramitar os permisos correspondentes para realizar o remolque coas máximas garantías de seguridade. Neste proceso, a rexedora destacou o papel de mediación do Concello e o traballo conxunto coa Capitanía Marítima de Vilagarcía, mencionando a colaboración tanto do anterior capitán marítimo, Juan Andrés, como do actual, Álvaro Vidal.
“Fixemos un gran equipo e fomos capaces, xestión tras xestión e axuda tras axuda, de formalizar hoxe esta saída sen poñer en risco a bocana da ría nin a dársena do noso peirao”, afirmou, destacando tamén a boa disposición da casa armadora desde o primeiro momento.
Resposta ás críticas e retirada do camión calcinado
A alcaldesa aproveitou a ocasión para responder a quen criticou a presenza do buque durante estes meses, sinalando que “os que sigan criticando demostraron que durante os seus meses de goberno non botaron ningunha soa man para axudar a que o barco saíse de aí”.
Así mesmo a rexedora dixo que “a intervención do Concello permitíu resolver paralelamente outro problema na contorna portuario: o levantamento xudicial e posterior retirada do camión que fora calcinado na zona”.
“Como máis interesados en que o peirao estea nas mellores condicións, nos puxemos a disposición de todas as partes. Hai que falar facendo, e o traballo vésese na xestión e non nas palabras ou mensaxes negativas”, concluíu a rexedora ribeirense.
