O escritor Xosé Neira Vilas, falecido en 2025, será a figura homenaxeada na vindeira edición (2027) do Día das Letras Galegas, segundo avanzan medios de comunicación como La Voz de Galicia, adiantándose deste xeito á confirmación oficial por parte da Real Academia Galega.
Segundo avanzan dende a RAG, trátase dunha figura literaria e humana de consenso, un talento indiscutíbel “cunha traxectoria que abrangue moitas vidas nunha soa”.
Neira Vilas é o autor de Memorias dun neno labrego (1961), o libro máis lido e traducido de toda a historia da literatura galega, cuxo protagonista (Balbino) é un dos grandes símbolos universais xurdidos dende as nosas letras. Neira Vilas, natural de Gres (Vila de Cruces) tamén achegou obras tan destacadas como Cartas a Lelo, Aqueles anos de Moncho ou O cabaliño de Buxo.
O recoñecemento a Xosé Neira Vilas xorde “dun consenso total” en parte pola gran calidade da súa obra, e tamén pola vixencia da mesma e a súa fonda dimensión humana. Tamén se tivo en conta a gran popularidade que segue a ter o seu legado entre lectores de todas as idades, un legado que indaga nunha das grandes cuestións sociais do noso tempo: a emigración.
