O Concello de Noia vén de instalar (co inicio deste mes de xullo) un punto informativo permanente na Oficina do Peregrino de Porto, un dos espazos de referencia para as persoas que inician o Camiño Portugués cara a Santiago.
O Concello explicou que neste novo espazo, as persoas peregrinas poderán descubrir o Camiño da Ría de Muros Noia, a Volta de Gloria e os principais atractivos turísticos da nosa vila a través de vídeos, mapas, guías e material divulgativo.
Dende o Consistorio engadiron que “cunha afluencia de arredor de 9.000 peregrinos ao mes e máis de 1 millón de visitas mensuais na súa oficina virtual, a Oficina do Peregrino de Porto convértese nun escaparate estratéxico para seguir impulsando a internacionalización de Noia e consolidar o Camiño da Ría de Muros Noia como unha das grandes portas de entrada á nosa vila”.
