Alfonso Rueda expresa a solidariedade de Galicia con Venezuela durante a entrega das Medallas Castelao 2026
O presidente da Xunta, Alfonso Rueda, trasladou este domingo a solidariedade de Galicia co pobo venezolano durante o acto de entrega das Medallas Castelao 2026, celebrado na Igrexa de San Domingos de Bonaval. O mandatario asegurou que Galicia vive “co corazón encollido” tras o dobre terremoto que sacudiu Venezuela e reafirmou o compromiso da comunidade autónoma para apoiar ás persoas afectadas.
Na súa intervención, Rueda enviou unha mensaxe de apoio á comunidade venezolana e aos galegos con vínculos co país suramericano, destacando que “todos vivimos esta traxedia como propia”. Ademais, lembrou que a Galicia actual “non se entende sen a emigración” e defendeu que a solidariedade forma parte da identidade do pobo galego.
O acto institucional coincidiu coa conmemoración do aniversario do primeiro Estatuto de Autonomía de Galicia e do regreso dos restos de Castelao á comunidade. Durante o seu discurso, o presidente da Xunta afirmou que as Medallas Castelao representan “unha expresión do afianzamento da autonomía de Galicia” e destacou que a comunidade viviu nas últimas décadas “a etapa de maior estabilidade e progreso da súa historia”.
Rueda tamén reivindicou a democracia, a autonomía e a honestidade como piares do desenvolvemento de Galicia e defendeu unha España constitucional “na que non teñan cabida discriminacións entre cidadáns ou territorios”.
Recoñecemento a cinco traxectorias de excelencia
Nesta edición das Medallas Castelao foron distinguidos o trompetista Esteban Batallán, a física Mar Capeáns, o atleta Adrián Ben, a empresaria da gastronomía María Barallobre e Charo Barca, directora da Fundación Andrea.
Durante o acto, o presidente puxo en valor a traxectoria dos premiados, aos que definiu como unha representación da Galicia “xenerosa, excelente e chea de talento”. Destacou especialmente o labor da Fundación Andrea no apoio ás familias con nenos enfermos, a proxección internacional de Mar Capeáns no CERN, a carreira deportiva de Adrián Ben, a contribución de Esteban Batallán á música e a figura de María Barallobre como referente da gastronomía galega.
Pola súa banda, os galardoados agradeceron o recoñecemento. Charo Barca dedicou a distinción ás familias ás que acompaña a Fundación Andrea; Esteban Batallán reivindicou o potencial da formación musical galega; Mar Capeáns animou a mocidade a confiar no seu talento; Adrián Ben comprometeuse a seguir levando o nome de Galicia por todo o mundo; e María Barallobre afirmou recibir a medalla con orgullo, lembrando as súas raíces e a súa paixón pola cociña.
