O Museo do Gravado de Artes (MUGART) vai acoller o vindeiro 6 de xuño a inauguración dunha nova exposición e a presentación dun libro centrados (mostra e libro) na figura de Isaac Díaz Pardo.
En concreto levantarase o pano da mostra Homenaxe a Isaac Díaz Pardo de Yolanda Carbajales, que dá nome tamén a un cartafol para bibliófilos da mesma artista. Será o sábado 6 de xuño na sala 2 do MUGART (Museo do Gravado de Artes) en Ribeira, ás 13.00 h. Poderase ver até o 28 de agosto deste mesmo ano.
Yolanda Carbajales unha artista galega moi recoñecida no ámbito do gravado, quen fixo xa numerosas mostras individuais dende a súa licenciatura en Belas Artes en 1991 e que conta con numerosos premios e distincións, entre os que se poden citar o Premio Atlante do Museo do Gravado de Artes no ano 2014 ou o X Premio de Gravado Cidade de Lleida en 2009.
A súa obra está presente en coleccións públicas e privadas españolas, italianas, polacas e rusas. Ademais, no ano 2018 acadou o certificado de Honra na III Edición Exlibris Competition en Vanne (Bulgaria), pois é esta tamén unha das súas especialidades.
Dende o MUGART explican que “a especialidade artística por excelencia que caracteriza a Yolanda Carbajales é a do gravado á maneira negra, a mezzotinta, unha técnica creada a mediados do século XVII polo alemán Siegen que consiste en granear a prancha metálica de maneira sistemática por medio do berceau, un aparello de aceiro con dentes miúdos que van logo a facilitar que a tinta enchoupe as pequenas indentacións de xeito que se a prancha fose ao tórculo o que obtería sería unha estampa totalmente negra, o negror, o misterio, a negación da luz, para que dende ese absoluto vaia xurdindo a luz, os brancos, pola man da artista creadora, un ir da negación á afirmación da vida (…)”.
Máis de vinte e nove anos de traballo nesta técnica da mezzotinta, que esixe paciencia e habilidade, converten a Yolanda Carbajales nunha artista consolidada e de forma artística, moi definida. “E ocorre”, engaden dende o MUGART, “que a maneira negra vai máis alá da arte da estampa, máis alá das dúas dimensións, ao estar preto da escultura, do táctil, da loita co metal, nun camiño en que a composición, o movemento, se combina coas incisións, co profundamento no material”.
