O Concello de Noia informou da apertura das inscricións para os obradoiros creativos e infantís da Feira do Libro local que se celebrarán durante o devandito evento. As prazas son limitadas.
O 23 de maio celebrarase un obradoiro de marionetas a cargo de Francisco López Cierto, para nenas e nenos de idades comprendidas entre os 5 e os 8 anos (na Alameda en horario de 11.00 a 12.00 horas) e para nenas e nenos de entre 9 e 12 anos (na Alameda tamén, con horario de 12.00 a 13.00 horas). Habilitaranse 24 prazas: 12 para cada grupo.
O 24 de maio será a quenda do obradoiro de banda deseñada que impartirá Fon Barreiro na Alameda, para nenas e nenos de máis de 6 anos, en horario de 12.00 a 13.00 horas e cun número máximo de prazas de 25 rapaces.
As inscricións cómpre facelas en cultura@concellodenoia.gal. As actividades serán na porta da Casa do Concello.
A Feira
A Feira do Libro de Noia 2026 é unha cita cultural que regresa á vila os días 22, 23 e 24 de maio e que converterá o centro de Noia nun espazo de encontro arredor da lectura, a creatividade e a cultura.
Segundo informou o Goberno local, “a recuperación desta celebración responde á aposta do Concello por impulsar actividades culturais de referencia e por poñer en valor a importancia da lectura como ferramenta fundamental de formación, convivencia e participación social”.
Durante os tres días desenvolveranse actividades para todos os públicos, con propostas infantís, obradoiros, música, presentacións e sinaturas de libros, ademais da participación de centros educativos e persoas vinculadas ao ámbito cultural.
As actividades celebraranse diante do Concello, no claustro e no Campo da Feira, creando un ambiente cultural aberto e participativo no corazón da vila.
