O deporte rianxeiro fixo historia esta pasada fin de semana, coa confirmación do ascenso á División de Honra do Club Xadrez Rianxo, entidade posta en marcha hai xa case vinte anos e que conta a día de hoxe con medio cento de xogadores e xogadoras.
Segundo conta a dirección do club, “logramos esta importante distinción tras unha xornada de volta do playoff de ascenso absolutamente emocionante na que nos enfrontamos contra o EXP A Coruña, nunha tarde de auténtico infarto que non se decidiu ata a última partida”.
Explican tamén que este éxito supón “un fito enorme”, xa que na Liga Galega de Xadrez participan máis de 100 equipo e o club de Rianxo atópase entre os 12 mellores de Galicia, “un logro espectacular que reflicte o traballo, a constancia e a paixón de todo o equipo durante toda a tempada”.
Dende o club rianxeiro quixeron facer tamén unha mención especial a un dos seus xogadores, Telmo, que a pesar da súa curta idade xa se consolidou como “un dos nosos xadrecistas máis importantes”, sinalaron.
A todo o devandito únense tamén os logros recentes do equipo do Club de Xadrez Rianxo na Segunda División, que conseguiu o ascenso á Primeira, polo que a tempada sáldase con dous históricos ascensos para a entidade rianxeira.
