Suspéndese a actividade deportiva do programa Xogade e federada no mar nos concellos afectados
A Xunta de Galicia vén de activar a alerta laranxa por temporal costeiro en todo o litoral da comunidade ante a previsión dun empeoramento significativo das condicións do mar nas vindeiras horas.
Co obxectivo de garantir a seguridade de persoas e bens, a Dirección Xeral de Emerxencias e Interior, dependente da Consellería de Presidencia, Xustiza e Deportes, trasladou a información a través do Centro Integrado de Atención ás Emerxencias 112 Galicia a todos os concellos das provincias afectadas, así como ás deputacións, servizos provinciais, agrupacións de voluntarios de Protección Civil e clubs náuticos.
Segundo as previsións da Axencia Estatal de Meteoroloxía (Aemet), o fenómeno meteorolóxico adverso comezará a partir de media tarde deste sábado no noroeste e oeste da provincia da Coruña. Xa de cara á medianoite, estenderase ao suroeste coruñés e ao litoral das provincias de Lugo e Pontevedra. Agárdase mar combinada do noroeste con ondas que poderán acadar ata os seis metros de altura.
Ante esta situación, a Secretaría Xeral para o Deporte anunciou a suspensión da actividade deportiva federada no mar e tamén do programa Xogade nos concellos afectados, cuxa relación pode consultarse na web oficial de Deporte Galego.
Desde a Xunta insístese na necesidade de extremar as precaucións, recomendando á cidadanía manterse afastada da liña de costa, especialmente en zonas como diques, rompentes ou paseos marítimos. Así mesmo, aconséllase evitar actividades no mar e revisar os cabos e amarres das embarcacións para previr posibles incidencias.
As autoridades lembran tamén a conveniencia de consultar a información actualizada a través da páxina web do 112 Galicia, onde se ofrecen datos meteorolóxicos e ligazóns de interese para seguir a evolución do temporal.
