A asociación empresarial Noia Histórica celebrou este martes 17 de febreiro o sorteo do premio da súa Campaña de San Valentín (14F): unha noite para dúas persoas no hotel do Faro de Fisterra, con almorzo incluído. A gañadora foi Isabel Morán que subiu 2 tíckets á web da patronal noiesa correspondentes a 2 compras diferentes, unha no establecemento Bebé Chico, na rúa Fray Lois Rodríguez, de artigos para bebés, e outra no establecemento de alimentación Basoñas Mar na praza Fanequeira. O obxectivo da campaña foi recompensar cunha noite romántica nun marco inigualábel a fidelidade da veciñanza cos establecementos de proximidade de Noia.
Dende Noia Histórica informaron a maiores que xa comezou a campaña dos Premios Molóns, “cos que queremos sortear experiencias e artigos que calen entre o público como os produtos de Apple sorteados no Nadal, o Spasinho de Outes, produtos de artesanía de Galicia, etc”.
A patronal rematou lembrando que en só 10 días de Campaña de San Valentín foron validados 1.000 tíckets de compra, o que dá unha idea clara do éxito de seguimento e participación da iniciativa.
