O delegado territorial da Coruña, Ovidio Rodeiro, deu a coñecer datos sobre as obras públicas que se están a retomar nas comarcas da provincia, incluída a contorna do Barbanza. Segundo informou, a contía total de investimento nestas actuacións, preto dunha trintena, é de 138 millóns de euros. Estes e outros datos foron achegados polo delegado territorial durante unha xuntanza por vídeo-conferencia co equipo directivo da Asociación de Empresarios da Construción da Coruña, ao que informou das actuacións reactivadas tralo parón da COVID-19 e, tamén, notou nota das súas demandas.
Respecto á área do Barbanza o Ovidio Rodeiro destacou as obras de ampliación da EDAR de Rianxo con 8,9M€ e a renovación de beirarrúas en Ribeira con 249.000 euros.
Tamén se retomaron obras de seguridade viaria e reforzos de firme, ampliacións e melloras dos nosos portos e obras en centros ocupacionais. Tamén outras actuacións de rehabilitación de vivendas, obras en polígonos industriais, humanizacións ou conservación da natureza.
Ademais destas obras, que estaban en execución antes do inicio do Estado de Alarma e que agora se retoman, a Xunta tamén vai continuar a tramitación doutras 11 obras que estaban licitadas ou pendentes de licitar e que suporán un investimento de máis de 7,2 millóns de euros.
En total, as que estaban en execución máis as que se continuarán por ser consideradas esenciais, suman 41 obras na provincia, que supoñen un investimento aproximado de 145 millóns de euros.
