Este 2025 o Concello de Rianxo puxo en funcionamento unha nova liña de axudas destinada a apoiar as actividades impulsadas polas anpas (asociacións de nais e pais) dos centros escolares rianxeiros. Trátase dun programa de subvencións dotado con 10.000€ que ten por finalidade “colaborar nos gastos derivados das actividades desenvolvidas ou promovidas polas asociacións de nais e pais de alumnado dos centro públicos do municipio”.
Segundo informou o Concello da man do seu alcalde, Julián Bustelo, “vimos de resolver as axudas da convocatoria deste ano que servirá para financiar, entre outras, actividades formativas e de conciliación familiar, así como a creación dun bosque comestíbel nun dos nosos centros”.
Máis investimento en bolsas
Ademais o Concello de Rianxo informou dunha nova suba no investimento en bolsas municipais para a adquisición de material escolar e dispositivos electrónicos. Na convocatoria correspondente ao curso 2025/2026 concederanse axudas por un importe superior aos 12.000€, “o que supón un importante incremento respecto da convocatoria anterior e máis do dobre que o importe correspondente ao curso 2022/2023”, sinalou o rexedor, engadindo que este medre vense traducindo tamén nun “notábel aumento das persoas beneficiarias”.
