O BNG de Ribeira amosou no pleno o seu apoio ao traspaso da Unidade de Condutas Aditivas (UCA) ao Sergas, un cambio que cualifican como “tarde, pero imprescindible” e que, segundo sinalan, responde a unha demanda histórica dos profesionais, dos concellos e da Federación Galega de Municipios e Provincias (FEGAMP).
O portavoz nacionalista, Luís Pérez Barral, destacou que o custo anual dunha unidade como a de Ribeira ronda os 600.000 euros para prestar un servizo de carácter comarcal e sanitario, “non propio dunha administración local”. Por iso, considera que a incorporación ao sistema público “é unha cuestión de responsabilidade e sentido común”.
Os nacionalistas puxeron en valor o labor da UCA, que ademais da atención sanitaria desenvolve programas de rehabilitación e reinserción social, como o taller de madeira, a restauración de elementos na illa de Sálvora, o mantemento de mobiliario urbano e centros educativos ou a colaboración na montaxe de beléns en Ribeira e Aguiño. “É un servizo que salva vidas e devolve dignidade ás persoas que loitan contra unha adición”, subliñou Pérez Barral.
Críticas ao atraso e ao bloqueo do PP
O BNG advertiu, con todo, de que o traspaso chega “con décadas de atraso” debido aos “continuos bloqueos” do Partido Popular. Recordaron que en 2009 estaba previsto construír un edificio específico para saúde mental e a UCA xunto ao Hospital da Barbanza, un proxecto adxudicado polo propio goberno de Feijóo en 2010 por un millón de euros. “A cancelación daquela obra e a indemnización á empresa deixaron á comarca sen unha infraestrutura esencial”, denunciaron.
Tamén lembraron que o goberno municipal daquel momento “se aliñou coa Xunta e votou en contra” dunha iniciativa nacionalista para dotar Ribeira dun inmoble que acollese os profesionais de saúde mental, unha decisión que cualifican de “lesiva para as persoas con problemas de saúde mental e adicións”.
Exixen avances reais tras o anuncio
A pesar das críticas, o BNG celebrou que a Xunta asuma finalmente as súas competencias, pero advertiu que o proceso “non pode quedar nun mero trámite”. Reclaman recuperar e executar o edificio previsto xunto ao Hospital da Barbanza, reforzar os recursos da UCA e garantir unha atención pública e digna para toda a comarca.
“O traspaso é unha boa noticia que no BNG sempre defendemos. Celebrámolo, pero non esquecemos nin o atraso acumulado nin as renuncias do PP. Agora toca pasar das palabras aos feitos”, concluíu Pérez Barral.
