O Concello levará ao Cine Elma As desterradas, da produtora Excéntricas, a obra gañadora do 25ª Premio Álvaro Cunqueiro para textos teatrais. A función, organizada pola Concellería de Cultura en colaboración coa Rede Cultural da Deputación da Coruña, será este domingo, 23 de novembro ás 19.00 horas.
As desterradas é unha obra escrita por Carme Varela e dirixida polo ribeirán Quico Cadaval. Está ambientada no século XVI, e conta a historia dunha pequena comunidade de monxas que se ve ameazada pola cobiza da xerarquía eclesiástica. Para rematar coa existencia das freiras, os señores da Igrexa están dispostos a difamalas e a ameazalas por todos os medios, recorrendo ao tribunal da Inquisición ou mesmo á violencia. Con este thriller, a autora, Carme Varela, buscou reconstruír os tempos de resistencia das comunidades de mulleres autosuficientes e poderosas.
O acceso á actividade, encadrada no Outono Cultural da Pobra, será gratuíto e libre ata completar a capacidade da instalación.
