No marco das actividades programadas para celebrar o 25N, Día para a Erradicación da Violencia Contra as Mulleres, a Concellería de Igualdade de Noia organiza unha manchea de actividades. A primeira será o sábado 22 de novembro e consistirá nun Obradoiro de Defensa Persoal para Mulleres. Trátase, segundo confirmou o Concello, de “promover a autonomía, a seguridade e o apoderamento”. Estamos ante unha actividade dirixida a mulleres maiores de 16 anos. Será este sábado 22 de novembro de 2025, en horario de mañá e de tarde (10:00 a 14:00 e 16:00 a 19:00), no Casino de Noia.
As inscricións están abertas até o vindeiro 19 de novembro no Centro da Información á Muller de Noia (o CIM). Máis información no teléfono 619 970 846 e na conta cim@concellodenoia.gal. Será unha actividade de balde pero con prazas limitadas (cómpre inscrición).
A seguir, a Concellería de Igualdade e o CIM de Noia convidan á veciñanza a compartir unha tarde de teatro e reflexión coa obra Ám@te, da Asociación Cultural O Xeito. Será o domingo, 23 de novembro ás 19.00 horas na Sociedade Liceo de Noia, con entrada de balde. Trátase dunha “proposta teatral que nos convida a reflexionar sobre o amor, a dor e a liberdade”, informou o Concello, engadindo que o espectáculo denuncia “eses tópicos que perpetúan a violencia machista” e convídanos a “repensar o que estamos a facer para finalizar esta traxedia social”.
A maiores, o martes 25 celebrarase unha concentración diante do Coliseo Noela, a partir das 11.45 horas, onde será lida a declaración institucional do 25 e onde se contará coa participación do alumnado dos centros educativos (haberá un minuto de silencio polas vítimas da violencia de xénero). Ademais, sortearanse seis vales de 50 euros e repartirase material da campaña de sensibilización. O mércores 26 celebrarase o contacontos E ti, que queres ser de maior?, para alumnado de 1º e 2º de Primaria.
