Sete veciños acadaron case vinte títulos recentemente: Iván Parada, Noa Santamaría,
Naira Parada, Marta Teira, Noah Olveira, Thiago Vidal e Juanra
Millares
O Concello de Ribeira celebrou unha recepción oficial para recoñecer os éxitos dos sete deportistas locais que acadaron numerosos títulos no European Championship Spain de kenpo, celebrado recentemente en Bolaños de Calatrava (Ciudad Real). Os participantes —Iván Parada, Noa Santamaría, Naira Parada, Marta Teira, Noah Olveira, Thiago Vidal e Juanra Millares— regresaron ao municipio cun total de dezaoito medallas entre ouros, pratas e bronces.
A alcaldesa, María Sampedro, felicitou o grupo polo seu desempeño e destacou “o orgullo que sinte a sociedade ribeirense por ter deportistas da súa proxección”. Sampedro salientou que estes éxitos “fan máis grande o nome de Ribeira” e animou os deportistas a seguir avanzando: “Son triunfos non só deles, senón de todo o municipio”.
No mesmo sentido se expresou o concelleiro de Deportes, Álex Vidal, quen puxo en valor o dinamismo deportivo da localidade. “Podemos presumir da boa saúde do deporte en Ribeira. Os resultados non serían posibles sen dedicación, esforzo e paixón polo que facedes”, afirmou.
Os resultados dos deportistas
O Club Kempo Barbanza participou no campionato con seis integrantes, que acadaron os seguintes títulos:
- Iván Parada: ouro en semi -80 kg Master e prata en katas senior.
- Noa Santamaría: bronce en katas por equipos e en semikenpo -60 kg (junior).
- Naira Parada: prata en katas e ouro en semikenpo -50 kg (xuvenil).
- Marta Teira: ouro en kobudo e semikenpo -60 kg, prata en katas e bronce en submission -60 kg (cadete).
- Noah Olveira: bronce en kobudo, submission -65 kg e semikenpo -65 kg (cadete).
- Thiago Vidal: bronce en kobudo e prata en semikenpo -40 kg.
Ademais, tamén competiu o ribeirense Juanra Millares, pertencente ao Kempo Pobra, que colleitou un brillante resultado: ouro en semikenpo e knckdown, así como prata en fullkempo, dentro da categoría master -70 kg.
O Concello destacou que estes logros demostran o bo momento que atravesa o kenpo na comarca e reafirmou o seu compromiso de seguir apoiando o deporte local.
