O Pazo de Martelo (Rianxo) acolleu esta fin de semana unha xornada organizada polo GDR Deloa dedicada a poñer en valor a diversidade, a calidade e o potencial das iniciativas LEADER no medio rural, poñendo o foco nas axudas LEADER 2026 para persoas emprendedoras, entidades e iniciativas con ganas de transformar o territorio. Desenvolveuse baixo o epígrafe Voces que transforman o rural.
O encontro contou coa participación de Xosé A. Touriñán, que presentou o proxecto Mulleres que Contan, así como de Cristina Pazos, Fran Dosil e Alicia Romero, quen compartiron as súas experiencias e como o programa LEADER foi clave para facer realidade os seus proxectos.
Mulleres que Contan, explicaron, é unha iniciativa de creación audiovisual comunitaria que recolle as voces, experiencias e memorias das mulleres maiores e migrantes de Galicia, dous colectivos que dedicaron e dedican gran parte da súa vida aos coidados. A través da construción colectiva dun arquivo audiovisual e dun relato común, o proxecto busca visibilizar o valor dos coidados -como un valor esencial nun presente de conflitos e crise climática–, para repensar a súa distribución e implicar –desde o desexo– a outros membros da familia e da comunidade.
O broche final puxérono os sons tradicionais de Amaiante, agrupación de música tradicional de Rianxo.
Informaron que axiña abrirase a nova convocatoria de axudas LEADER, e que quen teña interese nesta liña de axudas pode poñerse en contacto co GDR DELOA do que forma parte o Concello de Rianxo.
O obxectivo da xornada foi poñer en valor diferentes voces do territorio como ferramenta clave para o desenvolvemento rural. á cun espazo aberto e con petiscos.
