A Xunta incrementa un 7,33 % o investimento para mellorar infraestruturas, equipamento e atención ás 450.000 persoas da área sanitaria
A Área Sanitaria de Santiago de Compostela e Barbanza disporá no ano 2026 do orzamento máis alto da súa historia, cun total de 909,9 millóns de euros, segundo recolle o proxecto de orzamentos da Xunta de Galicia. Esta cifra supón un incremento do 7,33 % respecto ao exercicio anterior e permitirá reforzar a atención sanitaria das preto de 450.000 persoas que abrangue a área.
O investimento abrangue os gastos de persoal (capítulo I), os custos de funcionamento e subministracións sanitarias (capítulo II), as prestacións farmacéuticas e ortoprotésicas (capítulo IV) e os investimentos en infraestruturas e equipamento (capítulo VI).
Maior investimento para o Hospital Clínico Universitario de Santiago
O Hospital Clínico Universitario de Santiago (CHUS) concentra a maior parte do investimento previsto, con 43,7 millóns de euros destinados á ampliación e equipamento das consultas externas, un proxecto que se prevé rematar en 2026. Ademais, reservaranse 505.000 euros para a dotación da Unidade de Reprodución Humana Asistida.
No Hospital Médico-Cirúrxico de Conxo, destinaranse 500.000 euros á mellora do sistema de climatización, co obxectivo de modernizar as instalacións e mellorar o confort de pacientes e profesionais.
Investimentos no Hospital da Barbanza e na Atención Primaria
O Hospital da Barbanza contará cun investimento global de 1,13 millóns de euros, que inclúe a creación do Hospital de Día Oncohematolóxico, a mellora de envolventes e a compra dun novo mamógrafo valorado en 326.700 euros.
A Atención Primaria tamén será unha das prioridades. Está prevista a construción do novo centro de saúde de Noia, cunha partida de 2,1 millóns de euros, e 600.000 euros para melloras no centro de saúde de Porto do Son.
No caso do Centro de Saúde de Conxo, destínanse 825.000 euros para ultimar as obras e o equipamento, mentres que o novo centro de saúde de Teo recibirá 600.000 euros para iniciar o proceso de construción.
Centro de Protonterapia e novas dotacións tecnolóxicas
En 2026 tamén está prevista a finalización do Centro de Protonterapia de Galicia, un proxecto pioneiro que atenderá pacientes oncolóxicos de toda Galicia, Asturias, Castela e León e o norte de Portugal. Para esta infraestrutura, a Xunta dota un crédito superior aos 13,6 millóns de euros.
O orzamento garante ademais o incremento retributivo do persoal sanitario e non sanitario, o mantemento da prestación farmacéutica e ortoprotésica, e un importante investimento en equipamento médico tanto para centros de Atención Primaria como hospitalarios.
