A. Luaces.- Os once tripulantes do pesqueiro Ray Primero, dos que tres son veciños de Ribeira, foron trasladados na mañá deste domingo desde un punto a dez millas da costa coruñesa despois de que emitira un Mayday VHF 16 dando conta da existencia dunha vía de auga que non podían controlar e que, diante da posibilidade de que o buque afundira, deran orde de abandonar este e pasar á balsa salvavidas.
O Centro de Coordinación de Salvamento Fisterra mobilizou o helicóptero Helimer 402, as embarcacións Salvamar Betelgeuse, Altair e Shaula, así como o buque Duque de Ahumada da Garda Civil. Pouco despois das catro da mañá, o Helimer 402 rescatou da balsa á totalidade da tripulación en aparente bo estado de saúde, trasladándoos ao aeroporto de Alvedro onde foron atendidos para valoración médica do seu estado.
O pesqueiro, con vía de auga, permaneceu á deriva sen ninguén a bordo, escoltado pola Salvamar Betelgeuse e o buque María de Maeztu.
O Ray Primero, de bandeira francesa, ten base no porto de Lorient e foi construido no ano 1988. Foi remolcado ao porto da Coruña sen novidade após labores de achique obrigadas pola vía de auga ocasionada durante a noite pasada, probablemente arredor das tres da mencida.
…
