Esta vindeira fin de semana temos unha cita en Dodro co contador e actor Avelino González, que vén co espectáculo Chistes que foron contos. A cita será este 20 de setembro ás 17.00 horas no Pavillón de Deportes. Trátase dunha actuación pertencente ao Programa Rede Cultural 2025 da Deputación da Coruña. Nela, o autor rende homenaxe ás historias baseadas nos contos vellos: de curas, ricos, políticos, … que hoxe mudaron as formas pero non os contidos nin o fondo:
Avelino González
Actor, contador, monologuista, tradutor… Avelino González é o que faga falta. Empezou nisto por casualidade e agora gústalle incluso picar entradas. Gústalle entreter á xente con personaxes e historias que emocionen e divirtan porque a el tamén lle gusta que o emocionen e o divirtan.
En televisión ten actuado en series como Serramoura, Pazo de Familia ou Padre Casares para a TVG e na TVE1 en Hospital central, Cuéntame ou Seis hermanas. Ademais de diferentes traballos para cine ou series web. En teatro actúa, dirixe e traduce, tendo varios premios por obras como Bicos con Lingua ou Comedia.
