O barco Sievil duns 12 metros de eslora afundiuse na madrugada deste domingo no Peirao do Mariño de Portosín. A embarcación, que levaba varios meses amarrada sen actividade, atopábase xa en mal estado.
Facía uns días que o buque acumulaba auga no seu interior, motivo polo cal deuse aviso ao seu antigo propietario, un armador de Noia que o vendía recentemente a un comprador estranxeiro.
O barco, de nome Sievil, estaba construído en madeira e contaba cunha pequena ponte. Ademais, dispoñía de permisos para distintas artes de pesca e marisqueo.
Ata o lugar desprazáronse este domingo traballadores de Portos de Galicia, aínda que polo momento a nave non foi reflotada.
