O festival Titiriberia organizado pola asociación Morreu o Demo co apoio do Concello de Rianxo, a Xunta de Galicia, a Deputación da Coruña e o INAEM, celebra en Rianxo a súa décima edición até este domingo 17 de agosto. Este ano, o programa inclúe unha trintena de espectáculos da man de 19 compañías procedentes de Galicia, Portugal, Euskadi, Navarra, Aragón e Valencia. O programa para mañá domingo, xornada de despedida do encontro, inclúe dúas funcións.
Ás 13 horas na praia de Tanxil, a compañía aragonesa Teatro Árbole ofrecerá o seu espectáculo El ladrón de Sandías. Pelegrín é o protagonista deste teatro ambulante. Un personaxe que medrou coa complicidade de varias xeracións de crianzas e que conta con máis de 10 historias diferentes. É un monicreque aventureiro e, sobre todo, un antiheroe. Ármase cunha vasoira como lanza, un sinal de tráfico como escudo e un funil como casco e, coma aquel Don Quixote, con astucia e golpes adoita saír dos seus problemas.
Ás 20 horas, no Centro Cultural Vicente Vidal (Leiro), a compañía galega Viravolta poralle o ramo a esta décima edición de Titiriberia. Farao coa obra Vida, crimes e prisión de Toribio de Mañón. Trátase dunha recreación das andanzas que lle deron sona a Mamede Casanova “Toribio de Mañón”, famoso bandoleiro galego de principios do século XX, e que levaron os seus ósos ao cárcere. Nestas andanzas inspirouse Ramón María del Valle-Inclán para escribir a súa obra Las galas del difunto.
