A nova edición da Festa da Carballeira de Asados (Rianxo) celebrarase este venres 8 de agosto a partir das 20.30 horas, na Carballeira do Cura. Arrincará cunha actuación do clown Peter Punk, e proseguirá cunha mexilloada popular e sorteos. Pola noite haberá música a cargo da Orquestra Neverloura, Silvaredonda e Yaya DJ. A festa está organizada pola Comisión de Festas de San Pedro de Vilas coa colaboración do Concello.
A troula na Carballeira do Cura de Asados non rematará este venres xa que o domingo 10 de agosto está prevista a Festa das Avoas, que comezará cun pasaldeas con Os Liantes, Os Mersenarios e os Fabulosos da Baña. Ás 12.00 horas actuará a Banda Xuvenil da Escola de Música de Rianxo e logo haberá unha sesión vermú con Eva e Camilo e máis un xantar popular e veciñal. Ás 17.00 horas volve a música con Cé Orquestra Pantasma.
