A vindeira semana, a partir do xoves 17 de xullo e ata o 20 de xullo (domingo), vanse celebrar na parroquia de Xuño (Porto do Son) as Festas de Santa Mariña, edición 2025, organizadas pola Asociación de Veciños Sartaxas en colaboración co Concello de Porto do Son.
As celebracións comezarán o xoves pola tarde, véspera de Santa Mariña, con xogos populares para os máis pequenos (ás 18.30 horas), churrascada popular amenizada polo grupo de mariachis Willingtong. Pola tarde haberá verbena a cargo do dúo Obice Capital.
O venres 18 horas, día adicado a Santa Mariña, comezará ás 9.00 horas coas dianas e alboradas da agrupación Rexoubeiros. Ás 12.30 horas haberá misa solemne na honra de Santa Mariña. Á saída da misa haberá sesión vermú co grupo D’Crooners e ás 17.30 horas inchábeis e festa da escuma para a rapazada. Ás 22.30 horas comezará a verbena amenizada pola orquestra La Ola. Logo actuarán La Disquetera e Kike Varela.
Ao día seguinte, venres 19 horas, día adicado a San Antón, a festa comezará ás 9.00 horas coas dianas e alboradas a cargo da Banda de Música de Caamaño. Ás 12.30 horas celebrarase unha misa solemne na honra de San Antonio e logo, á saída do oficio relixioso, comezará a sesión vermú cos Litrisistas. Polo serán, ás 19.00 horas, haberá no campo das Furnas un partido de solteiras/os contra casadas/os, e pola noite haberá verbena con Pili Pampín, Neverloura e DJ Tchinclán.
O domingo 20 de xullo, día adicado á Virxe do Carme, comezará coas dianas e alboradas do grupo O Son do Pote. Ás 12.30 horas haberá misa solemne na honra da Virxe do Carme e á saída da misa está prevista unha sesión vermú co grupo Versionettes.
