Manuel Losada, escritor afincado en Boiro, estivo o venres 28 de febreiro no Pazo de Goiáns para presentar unha novela ambientada na súa terra de adopción: El banco de Carmen. Fíxoo acompañado da concelleira de Cultura, María Outeiral, da estudante de Xornalismo, Elena Suárez, e dun auditorio ateigado de público.
A cita literaria tamén foi unha cita musical, xa que se contou coa presenza da cantante Elisabet Lustres na xornada de presentación.
Segundo lembrou o autor, El banco de Carmen é “unha historia de suspense ambientada en Boiro e que conta con personaxes reais”. De feito, algúns destes personaxes estiveron presentes na cita literaria do Pazo de Goiáns, e cadansúa contribución á novela foi recoñecida cun premio (unha estatuíña) seguindo os formato dos festivais cinematográficos de maior renome (por exemplo os premios Óscar, cuxa gala 2024-25 xa iniciara o venres a súa conta atrás). En total, entregouse unha ducia de premios.
Manuel Losada. que leva sete anos vivindo en Boiro, cóntanos neste libro a historia dunha rapaza que, logo dunha noite de festa, queda a durmir nun banco.
Sinopse
Para Carmen, as noites de festa xunto aos seus amigos en Boiro (A Coruña) eran unha vía de escape ás presións da universidade, a familia e o futuro incerto. Con todo, unha decisión equivocada cambiará o seu destino para sempre. Tras unha noite de diversión e excesos, Carmen queda durmida nun banco mentres os seus amigos, sen sospeitar o perigo, deciden continuar a festa sen ela. Cando volven buscala, Carmen desapareceu. O que parecía unha simple imprudencia xuvenil convértese nun pesadelo que sacudirá a toda a comunidade. A medida que a investigación avanza, o inspector Francisco Alcalde descobre un armazón de segredos, mentiras e personaxes poderosos que farán o imposíbel por enterrar a verdade. Mentres os seus amigos loitan contra a culpa e o remorso, no aire flota unha pregunta imposible de ignorar: quen levou a Carmen aquela noite e por que?
