O Concello de Boiro celebrará o vindeiro martes día 4 de marzo o tradicional Concurso de Disfraces e Carrozas do Entroido, no que se van repartir 4.600 euros en premios, cuxas bases de participación (e toda a información que se poida precisar) están dispoñíbeis xa na web municipal.
Convócanse tres modalidades individual/parella, para maiores de 13 anos; grupos, formados por tres ou máis participantes maiores de 13 anos unha temática común; e carrozas, aparello móbil conformado por unha plataforma ou varias debidamente adobiadas acorde á temática do grupo e formada por un mínimo de catro persoas.
Poderán participar neste concurso tanto persoas físicas como xurídicas, que deberán formalizar a súa inscrición mediante o Rexistro Xeral ou sede electrónica do Concello de Boiro, de forma presencial no Centro Social de Escarabote, no teléfono 81 84 99 50 ou no enderezo electrónico leopoldo.portela@boiro.gal ata o xoves 27 de febreiro ás 13.00 horas.
O xurado valorará a estética, orixinalidade e creatividade dos disfraces; a posta en escena durante o desfile; as detalles da maquillaxe, vestiario, máscaras e demais complementos propios do Entroido; a elaboración propia; e o humor.
O desfile comezará o martes 4 de marzo ás 18.00 horas con saída da praza de Galicia, percorrerá a rúa peonil, Salvador Allende, rúa Principal e regreso á praza de Galicia onde haberá animación musical con DJ Matrek para a deliberación do xurado e dar a coñecer aos premiados.
