Este venres 17, ás 18.00 horas, farase entrega da viaxe familiar a Eurodisney á persoa afortunada no transcurso da campaña orientada ás redes sociais Volta o Nadal, voltan as Caramiñas. O acto será na Casa Mariñeira da Pobra do Caramiñal, situada nas inmediacións do parque do Castelo. Á cita asistirán a concelleira da Promoción Económica, Amparo Cerecedo; a técnica municipal, Sara Sánchez; a directora de Relacións Externas da empresa local CONGALSA, Ana Garrido; e a persoa premiada.
A viaxe familiar a Eurodisney para catro persoas que patrocina a empresa local CONGALSA, referente do sector da alimentación e dos produtos pesqueiros con sede principal no Polígono da Tomada, formou parte da campaña Volta o Nadal, voltan as Caramiñas. O sorteo desenvolveuse até o día 5 de xaneiro e participaron nel as persoas que compartiron imaxes captadas dende o inicio da actividade nos photocall coñecidos como Recunchos do Nadal situados na Covecha, no Fogar do Nadal (Casa Mariñeira), no parque de Raquel Fernández Soler, na praza dos Irmáns Axeitos, no Cantón da Leña, na praza Victoriano García Martí e na Praza de Abastos. As instantáneas compartíronse no apartado de historias do Instagram mencionando a conta @caraminhasnapobra.
A viaxe foi o gran premio final a unha campaña que pretendeu “incentivar as compras e dinamizar o comercio do concello da Pobra durante estas festas sinaladas”.
