O Concello de Porto do Son, ante as peticións xeneralizadas dos internautas (deportistas, seareiros, veciñanza do concello e do Barbanza, etc) compartiu nas redes materiais audiovisuais da pasada edición da carreira SinSon10K, celebrada o pasado 22 de decembro e na que, como lembraremos, impuxéronse Adrián Ben, campión europeo de atletismo en pista cuberta (en 2023) e diploma olímpico, na modalidade masculina (cun tempo de 29 minutos e 37 segundos) e Edymar Brea, que acadou un tempo de 33 minutos e 54 segundos, na categoría feminina.
O material compartido inclúe un interesante e completo vídeo de EME Sports e máis unha sección específica con todos os álbums de fotos de todas as edicións para ver, descargar e compartir.
Ademais de compartirse este vídeo e estas fotos, o Concello adianta que a seguinte edición, a 2025, celebrarase na fin de semana do 20 (a cita da rapazada) e 21 de decembro (a carreira absoluta).
