A cultura da prevención tería que ser algo básico en calquera sociedade, con todo non sempre é así e logo lamentámonos das consecuencias, cando xa é demasiado tarde. Todas as empresas teñen que cumprir coa Lei sobre Riscos Laborais, para protexer a todos os seus traballadores, tanto sexa en situación normal como en casos extraordinarios. Ao mesmo tempo, non o esquezamos, as diferentes administracións e organismos públicos tamén están sometidos á legalidade vixente.
É certo que non todos os políticos e gobernantes son iguais e está demostrado que é así. Uns preocúpanse e adiántanse ás situacións de risco, poñendo os medios necesarios para que sexan o menos daniño e perigoso para a poboación. Outros, céntranse na política da xeración de riqueza e o amiguismo para ocultar a realidade sobre futuras desgrazas ou desastres. Algo así ocorre cos depósitos de O Ferrazo, con Ence, con Altri, con varias empresas que verten os seus residuos ao mar, sen ningún tipo de control nin supervisión por parte das autoridades locais nin autonómicas correspondentes.
Moitos mariscadores e pescadores, así como as súas familias, levan tempo queixándose da falta de compromiso das autoridades ante os casos de contaminación mariña e ambiental. Logo chega a mortaldade do marisco e a contaminación das pesqueiras que mingua a capacidade extractiva e leva á miseria económica a miles de familias que viven honradamente de explotar os recursos naturais.
