Comprendo que determinados políticos percuren acubillo onde antes, cando exercían os seus cargos, nada querían saber, oficialmente, de achegamentos que actualmente asumen gratuitamente e sendo sabedores do dano que ocasionan a aquel a quen se refiren.
É o caso da xa célebre frase “se queren axuda, que a pidan”, que de xeito gratuito adxudican ao presidente do Goberno, Pedro Sánchez, e que fóra de contexto, adquire efectos maliciosos e prexudiciais para aquel en relación coa catástrofe xerada pola DANA que arrasou boa parte da costa mediterránea española e que eu, coma moitos máis, supoño, escoitamos sen o máis mínimo equívoco na versión orixinal completando unha frase que, a priori, nada tiña de ofensiva para o actual xefe do Goberno.
Posto todo isto en boca do ex presidente do Goberno español, Felipe González, ben troceado, fai que un non saia do asombro porque o verso libre do señor González non debera ser usado para invalidar a quen como el ben sabe, de ser malinterpretado pode causar -como causou- incómodas situacións. E, obviamente, os partidos da oposición a Sánchez aproveitan todo o posible esa xanela da casa allea aberta por un membro da mesma familia política de Sánchez.
Porque o ex presidente González non ten bula para espallar bulos deste calibre. A súa enorme experiencia neste senso debera levarlle a sopesar canto dí e non convertirse en galo de curral alleo para se meter onde nada ten que pintar e menos se é para prexudicar a quen ainda é, amais de presidente do Goberno español, secretario xeral do seu mesmo partido.
Ten interese González en atacar a Sánchez para beneficio de Feijoo?.
