A praza de Castelao de Rianxo acolle este mércores 24 de xullo, ás 21.30 horas, o espectáculo As palabras perdidas de Inventi Teatro.
Trátase dunha proposta que anima a falar galego dun xeito divertido, dinámico e moderno e que pon en valor o idioma, os ditos e as historias de Galicia.
A obra preséntanos á condesa Colorada e ao seu axudante Leocadiof, que son viaxeiros chegados dende moi lonxe. A condesa, unha coñecida contadora con fama internacional, disponse a narrar o seu relato preferido pero, ao abrir o libro, decátase de que o seu conto está cheo de buracos. Faltan palabras moi importantes, palabras como “ganapán”, “vagalume” ou “verme”. As palabras fuxiron da historia, borradas por falta de uso. Só utilizándoas de novo volverán ao conto.
