Este mes de xullo arrincan os traballos en Outes para remodelar a praza de Concello, e poñéndoa ao servizo da veciñanza. Segundo explica o Goberno local, a praza é usada na actualidade en exclusiva como estacionamento de vehículos, polo que se concibiu un proxecto para humanizala, para recuperar a beleza do enclave e para mellorar a conexión co paseo fluvial, o cal implica resolver a accesibilidade para as persoas á mesma. Por este motivo, o proxecto implica a construción dunha rampla que permitirá o uso pleno das persoas con mobilidade reducida. O Concello explicou que esta construción garantirá a accesibilidade ao tempo que respectará a estrutura e deseño da praza. Porén, explican, resultou preciso prescindir de dúas árbores nun dos laterais da praza, “pois dende o punto de vista técnico non se atopou outra alternativa viábel”.
O custe das actuacións é de 202.500 €, e están financiadas ao 100% con fondos Next Generation a través Plan de Sostenibilidade do Xeodestino da Ría de Muros e Noia. Prevese que a duración das mesmas sexa duns 4 meses.
Coa finalidade de ilustrar á cidadanía sobre o cometido das obras, o Concello compartiu un pequeno audiovisual nas redes sociais. O proxecto obtivo financiamento a través do Plan de Sustentabilidade Turística da Ría de Muros e Noia.
