Degustación gratuíta de Lirio de Ribeira durante as xornadas de regatas da ACT. Repartíronse 1.000 racións no porto de Aguiño que fixeron as delicias dos asistentes.
A Cooperativa Gallega del Mar Santa Eugenia de Ribeira (OPP83) realizou este sábado unha degustación gratuíta de Lirio de Ribeira durante a xornada da II Bandeira Barbanza Arousa, regata de traiñeiras da
Eusko Label Liga, organizada pola Asociación Clubs Traiñeiras (ACT) coa colaboración da Mancomunidade Barbanza Arousa.
A pesar de as inclemencias meteorolóxicas, a preparación do peixe da OPP83 xerou gran expectación entre os asistentes, que esgotaron en apenas unhas dúas horas as 1.000 racións do Lirio de Ribeira en tempura elaborado polo Cátering Baiuca. Os comensais puideron comprobar as excelencias desta rica e sa receita e recibiron material informativo sobre este peixe e a súa trazabilidade.
A xerente da Cooperativa Santa Uxía de Ribeira, María José Casais, destacou o desenvolvemento deste tipo de iniciativas para mostrar os beneficios do Lirio de Ribeira e contribuír así a aumentar o consumo deste rico pescado branco entre a poboación, especialmente entre os máis novos. Á degustación acudiu tamén
o concelleiro de Mar do Concello de Ribeira, Fernando Abraldes, que puxo en valor este produto pesqueiro de calidade capturado por barcos ribeirenses.
Con estas accións, a Cooperativa Santa Eugenia pretende dar a coñecer o Lirio de Ribeira entre os consumidores. O Lirio de Ribeira é a marca colectiva rexistrada pola OPP83 para dar valor a esta especie que conta cuns parámetros de calidade e frescura que o converten nun alimento de primeira liga.
Este produto pesqueiro é pesca do día e de proximidade, porque se captura en augas galegas por barcos de arrastre de litoral e chega a porto en apenas 7 horas.
Esta medida forma parte do Plan de Produción e Comercialización (PPyC) de 2024, cofinanciado polo FEMPA e pola Xunta de Galicia.
