Grazas a unha iniciativa apoiada pola Deputación da Coruña e coordinada por Jorge Mira (USC), o solpor unirá a Fisterra coa localidade xaponesa de Nachikatsuura o vindeiro 23 de xullo. Na dita xornada o sol porase no extremo oeste da Costa da Morte aproximadamente ás 22:00h, xusto no mesmo momento no que sairá en Nachikatsuura, no que serán xa ás 05:00h xa do día 24 en Xapón. Esta coincidencia, que so se produce 2 días ao ano, é “o motivo de unión entre ambos territorios, que contemplarán ao mesmo tempo o solpor fisterrán e o amencer nipón, mediante videoconferencia, nun evento que se celebrará de xeito simultáneo nos dous lados do mundo“, explicou a entidade provincial coruñesa, engadindo que o Semáforo de Fisterra será o escenario no que se poderá visualizar esta dobre estampa, nunha pantalla partida que amosará nun lado o sol saíndo polo Océano Pacífico e, no outro, o mesmo sol afundíndose no Atlántico, nun acto que contará con intervencións de representantes de ambos países.
A Deputación da Coruña apoia esta iniciativa, coordinada polo físico e catedrático da USC Jorge Mira, que parte dun estudo seu. O vicepresidente, Xosé Regueira, destaca que “queremos celebrar este vínculo que une dous territorios a máis de 10.000 km de distancia”. Unha unión “que vai máis aló”, apunta Regueira, “xa que compartimos moito máis que eses dous días nos que coinciden o solpor e o amencer: orgullo da nosa autenticidade como territorio, unha identidade que representa a nosa razón de ser e un respecto absoluto pola contorna”. Cuestións “que defendemos dende a Deputación como fitos irrenunciables e transversais, e que definen as nosas estratexias turísticas”.
Ademais, ambas localidades comparten a súa condición de seren extremos de dúas rutas de peregrinación declaradas como Patrimonio da Humanidade pola UNESCO: o Kumano Kodo – Camiño de Kumano – e o Camiño de Santiago de Compostela.
Deste xeito, o vindeiro 23 de xullo en Fisterra celebrarase ” a unión entre Fisterra e Nachikatsuura, Galiza e Xapón”, nun evento institucional no que se poderá visualizar nunha mesma pantalla, de xeito simultáneo, o sol nacente xaponés e o mesmo sol desaparecendo en Europa.
