Dous periodos de festas habia en Ribeira. As tradicionais do verán en agosto, que co paso do tempo foron tomando mais pulo ata converterse nas principais, e as dá Patroa, en setembro. Por certo estas últimas chegaban a xuntar as celebracións de varias festas locais e nalgunha ocasión tiveron duas semanas enteiras de duración
A imaxe que recollemos da web riveira.eu, amosa a celebración da festa en honra a San Cristovo patrón dos condutores no ano 1960. A imaxe, que sirve de base para o cartel da festa, amosa a imaxe do santo subida a un camión que se colocaba diante do Consistorio e os vehículos pasaban por diante mentres desde a “Sala de Festas Cambeiro” enfronte xusto dá imaxe e desde onde se tomou esta fotografía o sacerdote bendecía os vehículos. Por certo á dereita do camión aparece precisamente, Xosé Fernández Cambeiro, daquela concelleiro municipal ribeirense. Desta fotografia existe amais outra copia pero en branco e negro.
Pero falando xa da celebración deste ano salientar que o acto principal terá lugar este domingo día 14 as dez da mañá cunha concentración de vehículos de todo tipo no Malecón de Ribeira. O chamamento foi lanzado polo Concello en colaboración coa asociación Alfaia e a Parroquia de Santa Uxía para honrar a San Cristóvo.
O ambiente festivo non só afectará ao Malecón, senón que se estenderá por outros puntos do centro urbano da man da agrupación folclórica Xiada, que ás once ofrecerá un pasarrúas. A formación musical iniciará o seu percorrido en Bandaorrío.
O escenario da celebración trasladarase ao mediodía á igrexa parroquial de Santa Uxía, onde se oficiará a misa en honra de San Cristóbal. A liturxia oficiarase en memoria de todos os falecidos en accidentes de tráfico e incluirá nesta ocasión unha homenaxe ás forzas e corpos de seguridade do Estado.
Tras a misa, terá lugar unha procesión, encabezada pola imaxe de San Cristóbal, ata o Malecón, onde se procederá á bendición de todos os vehículos presentes. Está prevista a participación de integrantes do club local Os Reventapistóns. E, como colofón, motos, coches e camións emprenderán un percorrido que discorrerá por rúas como a avenida da Coruña e Miguel Rodríguez Bautista, para culminar en Pórta do Sol.
