Finalmente xa hai sentenza xudicial do caso do veciño de Rianxo do que falamos os días pasados dende este medio e que fora sancionado por reclamar ser atendido en galego no Centro de Saúde de Rianxo, en abril de 2021. O Xulgado do Contencioso Administrativo de Santiago de Compostela a respecto dos feitos acontecidos en 2021, cando un veciño de Rianxo esixiu ser atendido en galego nun cribado da COVID19, anulou finalmente a sanción de 600 euros imposta no seu momento pola Subdelegación do Goberno e recorrida posteriormente pola Mesa pola Normalización Lingüística.
O xulgado considera que “non está probado que o cidadán alterara o funcionamento do Centro de Saúde” e deixa, polo tanto, sen efecto a sanción de 600 euros inicialmente imposta pola Subdelegación do Goberno, en aplicación da coñecida como Lei Mordaza.
Porén, a Xustiza sanciónao por uns feitos distintos, impoñéndolle unha multa de 160 euros por unha infracción de “falta de respecto aos axentes da Policía Local de Rianxo”, feitos que, segundo lembrou A Mesa, “non encaixan na tipicidade pola que a Subdelegación incoou o procedemento sancionador, conculcando así principios básicos do ius puniendi que inspiran o dereito administrativo sancionador, como son o principio de tipicidade e o de congruencia do pronunciamento”.
A Mesa recorda que calquera cidadán ou cidadá que vexa vulnerados os seus dereitos lingüísticos pode solicitar axuda a través da Liña do Galego e insiste en que se puxeron en contacto coa Delegación do Goberno en Galiza, para pedir unha xuntanza co responsábel e para exixir formación en materia de dereitos lingüísticos para as forzas e corpos de seguridade do Estado, co obxectivo de que esta situación non se volva repetir.
