O Concello de Boiro colabora con Peñas Boiro AC na celebración de dúas actividades encadradas nas Festas do Verán 2024. A concelleira de Cultura, María Outeiral, participou este xoves 27 de xuño na presentación do programa xunto con David Laíño e Noelia Castaño, membros da asociación.
A primeira das datas de Peñas Boiro no marco das Festas do Verán será o venres 5 de xullo coa celebración da IV Remember Fest na Cachada, que comezará ás 23.00 horas coas actuacións dos picadiscos Marcos Magán, Xacobo de Mínimo Eventos e Tito Maverick. Previamente a charanga Mekanica Rolling Band fará unha ruada peñeira.
As actividades continúan o luns co XVI Luns das Peñas. A actividade comezará no parque da Cachada ás 11.30 horas coa xuntanza de grupos; ás 12.00 horas darán comezo os xogos peñeiros con xogos clásicos como o tiro á corda e algunhas novidades; tamén ás 12.00 horas haberá festa infantil na pista da Cachada, con inchables e festa da espuma para os máis pequenos.
Ás 13.45 horas celebrarase a festa da auga, que comezará co mangueirazo de honra que este ano correrá a cargo da bioquímica Vera García Outeiral. Bruno Deejay será o encargado da sesión musical na sesión vermú antes da comida peñeira, para a que se necesita inscrición previa.
Pola tarde haberá sesión musical a partir das 17.00 horas con Manu X, Rubén de Mínimo Eventos; Marcos Magán e DJ Sonic. Dende Peñas Boiro agradeceron a colaboración de todas as persoas que fan posíbel a celebración destes eventos e indicaron que “están a venda os vasos e as pulseiras de Peñas Boiro cos que calquera pode colaborar para que sigamos facendo estas festas”.
Pola súa parte a concelleira, María Outeiral, agradeceu o traballo de todas as persoas que forman parte de Peñas Boiro AC e que “se esforzan en levar a cabo actividades culturais no noso Concello e que, como cada ano, teñen un peso importante na programación das Festas do Verán 2024”.
