A Asociación Cívico Cultural Terra de Outes vai presentar esta fin de semana un libro que fai un repaso por algúns dos grandes tesouros patrimoniais e etnográficos do concello.
Trátase do volume Os hórreos de San Cosme, que se dará a coñecer ante a veciñanza este vindeiro 11 de maio no local sociocultural de San Cosme, precisamente, a partir das 20.00 horas.
Segundo explica María Dolores Pena, vicepresidenta de Terra de Outes, o libro vén a continuar o traballo de recollida e posta en valor da arquitectura popular que esta a facer a asociación, da man do seu autor Xan Mariño.
A presentación correrá a cargo do autor e contarase ademais coa presenza do alcalde Manuel González.
Unha vez rematada a presentación do libro presentarase o nº 66 da revista da Asociación Terra de Outes, que o colectivo veciñal vén publicando de forma periódica.
