O respaldo partiu dunha moción do BNG que recollía o sentir de moitos músicos e músicas de todo o país.
No texto da súa moción o BNG salientaba as achegas á cultura e música do país as realizadas polos músicos e músicas populares das que dan boa conta os historiadores Xesús Santos e Xosé Comoxo no seu libro Rianxo,Terra de Músicos con máis de 274 entradas nese volumeAo frente de todos irían Xosé Romero e Maruxa Miguéns, Os Rosales, parella musical que levaron por todo o mundo os sons do país e o nome de Asados e de Rianxo. Afinación, tempero e espírito de Galiza un piar da súa filosofía musical defendida a capa e espada por todos e cantos recantos pasaron.
Xosé Romero magoadamente finou no ano 2021 e foi enterrado en Asados mais Maruxa Miguéns está afortunadamente conosco, presente. O libro monográfico de Editoral Canela, titulado Os Rosales.O son da festa contén como ben sinala a historia de toda unha vida de loita e superación, cuxo motor recorrente foi e é unha constante paixón pola música tradicional.
A biografía de ambos podése seguir e iniciar no ano 1930 onde unha crianza xoga cunha cana e unha vincha de porco como fol. Desde eses comezos en épocas de privacións e escuridade chegará ao máis alto da música tradicional creando o grupo Os Rosales en 1952, que marcará unha época de grandes gaiteiros para a bisbarra de Arousa e a todo o país, conectándose cos Campaneiros e Areeiras ou o propio Ricardo Portela. Tamén se sinala o seu paso polo cuarteto Aires da Nosa Terra xunto aos irmáns Carou.
Ao cuarteto, formación clásica desde os Gaiteiros de Soutelo de Montes do célebre Avelino Cachafeiro, integrou felizmente a muller, Maruxa, a comezos dos anos sesenta para presentar as pezas, cantar e tocar varios instrumentos de percusión. Á mestría compositiva e interpretativa de Xosé Romero uniuse así a versatilidade e ampliación dos rexistros que daba a voz de Maruxa e xuntos, compartiron palco coas mellores orquestras. E é que como o gran Portela fixeron causa común para ocuparen letras grandes dos programas festeiros e dignificar a música do país.
Primeiro Maruxa, axiña os fillos e fillas, iranse sumando á paixón dos pais para chegar a gravar dous discos, participar en ducias de programas de televisión e compartir actuacións con Andrés do Barro, Milladoiro, Amancio Prada.
E centos de actuacións con con grupos coetáneos do panorama tradicional amenizando as festas e romarías tradicionais e viaxando a Bélxica ou Suiza epicentros da colectividade galega no exterior.
Xosé Romero e Maruxa ademáis non se gardaron para sí a súa arte musical, encargáronse tamén de transmitila ás novas xeracións fundando diferentes agrupacións como a do Centro Cultural Simón Varela de Asados, A Relinga de Muros ou Ollando as Cercas de Isorna, entre otras, ás que ensinou ou seu repertorio. Destas ensinanzas dan boa proba o actual Rio de Anxo, que recolle todo o sabor do repertorio do mestre.
Por todas esta pensou o BNG existían sobradas razóns para promover que Xosé Romero a título póstumo e Maruxa Miguéns reciban a meirande distinción que o Concello de Rianxo pode outorgar aos seus fillos e filas máis ilustres: o de Fillo e Filla Predilectos. Unha distinción que dignifica tamén en certa medida aos músicos populares do noso concello e á nosa música tradicional ao declarar que tamén desde ela se constrúe a cultura e nos encamiña a unha sociedade mellor dunha terra con conciencia e identidade de seu. Uniranse deste xeito ás persoas que máis teñen contribuido a que Rianxo sexa terra fértil para a cultura do País.
Esta moción foi respaldada por textos de varios referentes culturais do Concello, da bisbarra, e fora dela como o asinado por Xaneco Tubío, presidente da Asociacioón de Gaiteiros Galegos e Galegas dicindo:
Xuntos levaron a Asados e Rianxo polo mundo adiante. Moitos de nós, identificamos a vosa vila con Xosé e Maruxa. A nosa asociación nos últimos anos ven de organizar diferentes encontros e xornadas formativas no Concello de Rianxo grazas á súa presencia nel, e ao apoio do goberno local. Dende unha homenaxe ós propios protagonistas (que xuntou arredor de 250 persoas no Auditorio) a xornadas tales como: A gaita no mar, Xornadas de Tradición en Feminino e moitas outras.
Tamén José Luís Dopico, Músico, Director do CEP X. Ma. Brea Segade de Taragonha e Membro da diretiva da Irmandade da Música Galega que sinalou: A través deste escrito, queremos manifestar o nosso apoio a declaração de filha predileta e filho predileto do Concello de Rianxo a Eclíptica Órbita Miguéns Lustres, Maruxa, e a Xosé Romero Suárez. Ambos são figuras rianxeiras cimeiras da cultura musical galega, baseando sua importância no desempenho do seu oficio de gaiteir@s, buscando, em todos os momentos, a excelência.
Santos e Comoxo, antes mencionados, sinalaron aos Rosales como os mellores embaixadores de Rianxo nos escenarios de Galicia e especialmente sinalan a súa contribución desde a vocación á igualdade, creatividade e innovación.
No acordo plenario aprobado onte por unanimidade faculta ao Alcalde a iniciar o expediente tras o que se realizaría un acto público no que varias asociacións de músicos e agrupacións expresaron o seu desexo de participar para que sexa unha festa musical de homenaxe a dous dos grandes da música do País.
