O Concello de Muros emitiu un comunicado no que informa de cambios na programación do Entroido desta fin de semana, cando estaba prevista, o domingo, o concurso de comparsas.
Dende o Consistorio detallan que “con gran pesar, pero sendo responsábeis, queremos informar á nosa veciñanza que o tan agardado concurso de comparsas, programado para este domingo 25 de febreiro, lamentablemente posporase, outra vez, debido á previsión de chuvias persistentes”.
No comunicado engádese que “tralas consultas realizadas con Meteogalicia sobre as condicións meteorolóxicas previstas para o día do evento, recibimos a confirmación da chegada dunha fronte de chuvias persistentes. Xunto con isto, a Garda Civil tamén recomenda o seu aprazamento”.
Por iso, co “propósito de garantir a seguridade e o divertimento de todas as persoas participantes e do público”, o Concello tomou “a difícil decisión de aprazar o concurso”. A nova data de celebración será comunicada debidamente nos próximos días, unha “vez que avaliemos todas as opcións dispoñíbeis”.
O comunicado remata cun profundo agradecemento á comprensión e paciencia da veciñanza neste asunto: “Estamos comprometidos a ofrecer un evento da máxima calidade e estamos seguros de que, co voso apoio, conseguiremos facelo realidade nunha data próxima”.
