Pedro García Aguado impartirá un programa de charlas en Ribeira, este martes 6 de outubro e destinadas ao alumnado de 3º e 4º da ESO e tamén ao público en xeral do termo municipal e do Barbanza. Darán comezo ás 10.15 horas e porán o foco en como identificar e previr as adiccións ao mundo dixital. As sesións serán no Auditorio Municipal. A alcaldesa, María Sampedro, acompañará a García Aguado na inauguración dos relatorios.
O Concello de Ribeira colabora nesta iniciativa: unha sesión enmarcada na xira de coloquios de Pedro García Aguado pola xeografía galega, impulsada pola Federación Autonómica de Centros de Ensino Privado (CECEGalicia)
A primeira das charlas irá destinada a alumnado de 3° e 4° da ESO de tódolos centros educativos do municipio, de 10.15 a 11.30 horas, no novo Auditorio Municipal; mentres que a segunda está orientada a pais, nais, profesorado e todo o público en xeral, en horario de 17.30 a 19.00 horas. Para a sesión da tarde só se require inscrición en liña.
Pedro García Aguado é un reputado educador parental, conferenciante e experto na prevención e intervención de adiccións ás novas tecnoloxías e redes sociais. É ex-campión olímpico de waterpolo e ex-presentador do programa de televisión Hermano Mayor. Redirixiu a súa traxectoria profesional cara á axuda de familias no ámbito do comportamento xuvenil. O seu traballo focalízase en abordar o impacto e os riscos que o uso non supervisado das Tecnoloxías da Información e a Comunicación (TIC) causan nos menores de idade.
