Este outono, A Pousada de Boiro afronta un dos momentos máis ambiciosos da súa programación, consolidando a súa aposta “por unha programación estable, diversa e vinculada á creación musical galega”, explican dende a dirección do establecemento, engadindo que “ao longo deste ano estamos reunindo artistas de diferentes xeracións e estilos, desde a música de raíz ata o rock alternativo, pasando pola canción de autor e propostas de carácter máis experimental”.
Esta semana e a seguinte concentran especialmente esa filosofía con tres nomes que ocupan un lugar destacado na música galega contemporánea: Caamaño & Ameixeiras, os boirenses Triángulo de Amor Bizarro e Los Kalahari.
“Son tres propostas moi diferentes, pero tamén tres formas de entender a relación entre creación, territorio e directo”, indican dende A Pousada.
Caamaño & Ameixeiras: tradición galega para construír algo novo
A primeira cita será este venres 9 de outubro ás 22:30 h con Caamaño & Ameixeiras, unha das propostas máis interesantes do folk galego actual. Sabela Caamaño, ao acordeón, e Antía Ameixeiras, ao violín e á voz, parten da tradición musical galega para levala cara á composición propia, aos novos arranxos e á experimentación. O resultado é un proxecto no que a raíz non funciona como límite, senón como punto de partida para construír unha linguaxe contemporánea.
Desde a súa formación en 2018, o dúo foi consolidando unha traxectoria recoñecida dentro da escena galega, combinando o traballo sobre o repertorio tradicional coa creación propia e unha forte personalidade escénica. A súa presenza en A Pousada sitúa a sala, unha vez máis, no circuíto de propostas que están renovando a música de raíz desde Galicia.
Triángulo de Amor Bizarro comeza a súa nova xira na súa casa
O sábado 10 de outubro ás 22:30 h será a quenda de Triángulo de Amor Bizarro, nun concerto especialmente significativo porque a banda inicia en Boiro a súa nova xira. Non se trata dun escenario calquera: é a súa casa. O grupo mantén unha estreita relación coa localidade, onde ten o seu estudo e desde onde desenvolveu boa parte da súa historia artística. Con máis de dúas décadas de traxectoria, Triángulo de Amor Bizarro converteuse nun dos nomes fundamentais do rock alternativo estatal, transitando polo noise rock, o post-punk, o shoegaze, a psicodelia e a experimentación. Comezar aquí a nova xira engade ao concerto unha dimensión especial: o regreso a un espazo próximo para a banda e o inicio dun novo capítulo diante do seu público.
Tato López e César de Centi: unha tarde para as cancións
Los Kalahari: a historia de Siniestro Total volve subir a un escenario
A seguinte semana, o venres 16 de outubro ás 21:30 h, chegarán Los Kalahari, un proxecto que ten unha conexión directa coa historia do rock galego. Na formación están Javier Soto, guitarrista histórico de Siniestro Total, e Andrés Cunha, último batería da banda, xunto a Chus Dasilva e Alberto Cunha.
A súa proposta recupera parte dese espírito irreverente, humorístico e rockeiro, pero desde a perspectiva de músicos que formaron parte daquela historia. O concerto en A Pousada será así tanto un encontro coa memoria do rock galego como unha oportunidade para comprobar que aquela actitude segue tendo vida propia sobre o escenario.
Pava pecha estas dúas semanas de programación
O sábado 17 de outubro ás 22:30 h, Pava, o proxecto liderado pola coruñesa Lucía Aldao, pechará este bloque de concertos. A súa proposta combina canción, psicodelia, pop e rock alternativo, ampliando unha programación na que A Pousada volve apostar pola diversidade de estilos e por artistas con personalidade propia.
