O mes de setembro vainos deparar unha nova visita teatralizada ao Pazo de Goiáns (Boiro) a cargo da agrupación Os Quinquilláns. A vindeira sesión (unha visita teatralizada, guiada e comentada) será este venres 18 de setembro ás 19.00 horas. A entrada será libre aínda que as prazas veñen limitadas.
Cómpre facer as inscricións no Centro Social de xeito presencial ou a través do teléfono 981 84 84 25.
O programa de visitas, realizadas polos Quinquilláns, ten como finalidade dar a coñecer a historia do inmóbel a través das personaxes que o habitaron.
Estas sesións divulgativas comentadas están dirixidas a mostrar polo miúdo, dun xeito divertido e tamén divulgativo, os importantes tesouros arquitectónicos e ambientais do pazo e, tamén, a súa historia no tempo.
O programa vén da man do Concello de Boiro e as sesións serán conducidas novamente polo grupo Os Quinquilláns, compañía teatral especializada no teatro de rúa e infantil, que conta cunha longa experiencia recreando algúns dos fitos máis destacados da nosa historia e da nosa cultura.
Organiza o Concello co apoio da Deputación da Coruña e a Xunta de Galicia.
