O PSdeG rianxeiro propón conseguir a cesión dun terreo para estacionamento en Tanxil e impulsar unha actuación integral na contorna da praia.
O grupo socialista considera que “conseguir a cesión deste terreo sería unha oportunidade para crear un novo aparcadoiro e, ao mesmo tempo, abordar unha mellora integral da contorna”.
A proposta, din, “pasa por actuar sobre o propio terreo, mellorar e ampliar a estrada de acceso, dotar as vivendas dos servizos básicos de saneamento e estudar alternativas para a situación actual destas casas”.
Os socialistas consideran tamén que esta actuación debería permitir mellorar o acceso peonil ás praias de Tanxil e Quenxo, con beirarrúas que conecten o aparcadoiro coa baixada ás praias de forma máis segura e accesíbel.
“Conseguir a cesión sería o primeiro paso, pero debemos aproveitar a oportunidade para mirar a zona no seu conxunto e dar solución a necesidades que levan anos pendentes”, sinalan desde o PSdeG.
Para o PSdeG, é unha oportunidade para mellorar os accesos, os servizos, a mobilidade e a conexión coa contorna das praias.
