Este sábado 5 de setembro celebrouse a Festa do Carme no Freixo (Outes). Participaron veciños e profesionais do sector marítimo-pesqueiro da contorna, aos que se uniu a conselleira do Mar, Marta Villaverde, que salientou na compaña do alcalde, Francisco Calo, “o orgullo e a identidade viva dunha localidade estreitamente ligada ao mar, onde o esforzo diario das súas familias mantén vixente o legado mariñeiro de Galicia”. Tamén transmitiu o apoio da Xunta a unha comunidade costeira que sabe conxugar as súas raíces artesanais co desenvolvemento económico vencellado á actividade da cadea mar-industria.
A Festa do Carme do Freixo no concello de Outes celébrase por tradición a principios de setembro na parroquia de San Xoán de Sabardes, tendo como epicentro o histórico porto do Freixo. Trátase dunha celebración cunha fonda identidade mariñeira ligada á ría de Muros e Noia.
A festa arrincou pola mañá coas dianas e alboradas polas rúas a cargo do grupo Xeitura de Esteiro. Antes do xantar foi a quenda da sesión vermú, que veu da man do dúo Aires de Broña.
Pola tarde celebrouse o oficio da misa solemne cantada (coa Coral Francisco Añón) e posterior procesión marítima, un dos momentos máis emotivos onde as embarcacións acompañan á imaxe da Virxe polo mar, co acompañamento da Banda de Música de Outes.
Máis tarde foi a quenda da Charanga O Rumbo.
Pola noite (ás 23.00 horas) hai verbena coa Orquestra New York e (logo) a Macro Discoteca Móbil Chocolate.
