O Concello de Muros realizou durante os meses de verán diferentes actuacións no CEIP Ramón de Artaza, o CEIP Ricardo Tobío e o CEIP de Louro, dando resposta ás demandas da comunidade educativa.
Dende o Consistorio lembran que os concellos teñen as competencias de mantemento dos centros educativos, pero son de responsabilidade da Xunta de Galicia as obras de carácter estrutural nas instalacións.
“O ensino público é unha prioridade para o Goberno local, por iso atendemos dentro das nosas competencias as demandas da comunidade educativa e as familias para mellorar o estado dos centros”, sinalou a alcaldesa de Muros, María Lago.
“A Brigada de Obras municipal encárgase de facer os traballos que consensuamos coas direccións dos colexios, en función tamén das actuacións levadas a cabo en cada un deles en anos anteriores”, explicou a concelleira de Ensino, Laura Rivadeneira.
Nas últimas semanas acometéronse traballos de carpintería, fontanaría e electricidade. Procedeuse ademais ao pintado de aulas e patios, limpeza de muros, patios interiores e exteriores, arranxo de persianas, limpeza de canlóns e amaño de goteiras.
“Apoiamos as demandas dos centros no que respecta ás súas necesidades de melloras estruturais: entre outras obras, o CEIP Ricardo Tobío precisa dun cambio de cuberta e da substitución das fiestras, mentres que o CEIP de Louro tamén demanda o cambio das fiestras”, lembrou Rivadeneira.
