Rosana Pérez denuncia a «tortura» que sofren os condutores polo peche de accesos e a mala sinalización
A deputada do BNG Rosana Pérez presentou no Parlamento galego unha batería de iniciativas para instar á Xunta a actuar ante o risco e as incidencias derivadas das obras na AG-11. Malia recoñecer que os traballos iniciados en abril son necesarios, cualificou a situación actual de «tortura diaria» para os milleiros de persoas que empregan a autovía do Barbanza.
A parlamentaria denunciou a deficiente sinalización, especialmente de noite, e a falta de información previa sobre os desvíos. Isto obriga aos vehículos a buscar alternativas pola estrada AC-305, tamén afectada por obras. Segundo expuxo, a adxudicataria corta tramos extensos e pecha varias saídas consecutivas á vez —como ocorreu este mes na Pobra e Palmeira—, o que ademais bloquea o paso a servizos como as gasolineiras.
Pérez alertou tamén do perigo derivado de conos desprazados ou restos na calzada que xa provocaron algún accidente. Por iso, o BNG reclama ao Goberno galego que aumente a vixilancia sobre as obras, obrigue á empresa a minimizar molestias e depure responsabilidades se non cumpre co contrato.
