Navia Espacio de Arte (Vigo) inaugura este martes, 15 de setembro ás 18:30 horas, a exposición Mulleres, do artista barbanzán Jontxu Argibay (Castiñeiras, 1976). Trátase da 17ª exposición que acolle este espazo artístico de APAMP – Asociación de Familias e Mulleres con Parálise Cerebral, que continúa así coa súa aposta por achegar a arte contemporánea á cidadanía desde unha perspectiva aberta, inclusiva e accesíbel.
A nova mostra reúne 36 obras, 17 pinturas e 19 esculturas, a través das que o artista con taller en Aguiño ofrece unha mirada íntima, persoal e contemporánea sobre as mulleres: mulleres próximas ao artista e outras figuras coñecidas forman parte dunha proposta na que os rostros, os corpos, as emocións, os oficios e as historias se converten en materia artística.
A exposición presenta diferentes técnicas e linguaxes. As acuarelas parten de instantes e imaxes compartidas nas redes sociais, mentres que os óleos se centran principalmente en amigas e mulleres da contorna do artista, segundo confirma o espazo de arte.
Nas esculturas, o corpo feminino convértese en forma, volume e expresión, nun percorrido por diferentes sentimentos e realidades. Mulleres é, ante todo, unha homenaxe. Unha mirada construída desde a admiración e o respecto, na que Jontxu Argibay busca capturar non só a aparencia das súas protagonistas, senón tamén aquilo que as fai únicas: a súa personalidade, as súas emocións e as súas historias.
Con esta inauguración, Navia Espacio de Arte suma xa 17 exposicións ao longo da súa traxectoria, reafirmando o seu compromiso coa creación de espazos de participación cultural e coa difusión da arte en diálogo coa diversidade. A inauguración contará coa presenza do artista Jontxu Argibay, que acompañará este primeiro encontro do público coa súa obra.
A exposición estará aberta ata o 30 de outubro de 2026.
Navia Espazo de Arte nace para poñer en valor e dinamizar a vida cultural e social da nosa contorna, coa vocación de converterse “nun espazo de referencia a través do cal dar difusión e visibilidade á gran obra artística existente na nosa comunidade”.
