A nosa revista mensual “O Barbanza“ publica a súa edición 91 correspondente ao mes de setembro de 2026. Un número marcado polo inicio da nova tempada, importantes proxectos de infraestruturas nos concellos e os eventos que poñen o ramo ás citas festivas do verán na ría de Arousa e na contorna sonense.
No eido municipal, o inicio de curso chega acompañado de destacados investimentos públicos. O Concello de Ribeira formalizou a adxudicación de catro contratos por máis de 312.000 euros, entre os que sobresae a construción do novo parque infantil da praza do Centenario por máis de 160.000 euros. Pola súa banda, O Porto do Son activa un ambicioso plan de obras prioritarias e saneamento con máis de 1,4 millóns de euros, mentres Rianxo inicia a licitación da primeira fase para renovar o firme do paseo marítimo entre Rinlo e a praia do Pazo.
A recuperación patrimonial e a modernización de servizos son outros dos eixos deste número, no que destaca o histórico regreso da escultura da Virxe de Guadalupe, obra de Francisco Asorey, ao seu emprazamento orixinal na praia de Tanxil tras máis de dúas décadas retirada. Así mesmo, repásanse os avances na rehabilitación integral da Casa da Cultura de Boiro —adxudicada en 3,6 millóns de euros— e a remodelación do complexo deportivo da Tarela no Porto do Son.
A edición complétase cun amplo seguimento das citas culturais e tradicionais da comarca, detallando os programas do Carme sonense, o Nazareno da Pobra coa Procesión das Mortallas, a Guadalupe de Rianxo e Santa Uxía de Ribeira, canda espazos adicados á memoria local coa homenaxe ao intelectual Quico Domínguez, os novos obradoiros de emprego e o balance da duodécima edición do Torneo de Golf CONGALSA.
