O Concello de Muros presentou co inicio do curso unha completa axenda de escolas deportivas e obradoiros culturais ao tempo que publicou as bases e o prazo de preinscrición de todas as actividades, que será do 9 ao 19 de setembro. A concelleira de Cultura, Caridad González, e o concelleiro de Deportes, Damián Torea, convidaron “á veciñanza de todas as parroquias a participar nas actividades” e destacaron que “este curso hai actividades novas para chegar a máis xente”.
Para persoas adultas e mozos e mozas, haberá obradoiros culturais en Esteiro (arte floral, bordado, encaixe de bolillos e traballos manuais); Tal (bordado e traballos manuais); Abelleira (bordado, encaixe de bolillos e traballos manuais); Torea (traballos manuais); Serres (bordado, encaixe de bolillos e traballos manuais); Muros (arte floral, bordado, costura e encaixe de bolillos, gravado e pintura, teatro, baile de salón, traballos manuais e cociña); Louro (bordado e traballos manuais), e Trasdacosta (bordado).
Para nenos e nenas, están previstos obradoiros de teatro e pintura (nados entre o 2019 e o 2015, ambos incluídos).
As escolas deportivas desenvolveranse en Esteiro (Pavillón Xosé Lago); Muros (Pavillón de Miraflores e piscina); Louro (CEIP Louro); Abelleira (Centro de Sorribos), e Torea (Casa Reitoral).
Haberá clases de ximnasia de mantemento; actividades predeportivas; ximnasia rítmica; taekwondo; baloncesto; fútbol sala; patinaxe; xadrez, e bádminton.
As persoas interesadas teñen toda a información e as bases completas na web municipal.
