Con motivo do inicio do curso escolar, o Concello de Muros e a Policía Local implantaron novas medidas de ordenación do tráfico nas inmediacións do CEIP Ramón de Artaza, destinadas a “mellorar a seguridade do alumnado, das familias e do transporte escolar, así como a facilitar a circulación nas horas de entrada e saída”. As medidas entraron en vigor co inicio da actividade docente, este mércores 9 de setembro.
As principais medidas son a habilitación dunha zona de uso exclusivo para o autobús escolar, nos horarios establecidos na sinalización e durante o curso en horario lectivo; a prohibición de circulación, agás para o autobús escolar nos horarios sinalados, na vía que bordea o CEIP Ramón de Artaza en dirección Valdexería-AC-550; e a limitación de estacionamento nos arredores do centro, onde só se permitirá aparcar (na vía que bordea o colexio) na marxe dereita no sentido AC-550-Valdexería, debendo manterse libres o resto de zonas non habilitadas para tal fin.
Así mesmo, o Concello lembra “a importancia de respectar a sinalización horizontal existente, especialmente as liñas amarelas e demais marcas viarias, evitando estacionamentos que poidan dificultar a circulación ou comprometer a visibilidade e seguridade nos accesos ao centro”.
Desde a Policía Local solicitouse a colaboración de condutores e familias e o respecto á sinalización vertical e horizontal, “co obxectivo de conseguir unha circulación nesta zona escolar máis segura, fluída e ordenada para todos”, engadiu o Concello.
